ليلة الفرح الشعبى

أحمد اسماعيل · 03-23-2010, 06:41 PM

الفرح الشعبي والفرح الريفي وجهان لعملة واحدة.. هذه العملة هي (الفرحة الحقـيقية) سواء للعروسين أو الأهل، والفرحة هنا لا تقتصر علي يوم أو ليلة واحدة أو فترة زمنية محددة كما هو الحال في أفراح المدينة في القاعات والنوادي والفنادق.

فمراسم الاحتفال في الأفراح الشعبية والريفية تمتد لأربعة أيام أو أكثر من ذلك، ولكل يوم من هذه الأيام طقوسه وأغنياته الخاصة النابعة من تراثنا الشعبي المصري.

التنجيد و الأثاث
يبدأ الفرح بـ (ليلة التنجيد) حيث يجتمع أهل العروسين للإعلان عن بداية الأفراح واقتراب موعد الزفاف وهنا نسمع أغاني خاصة بهذه المناسبة فنسمع مثلاً
ما تعلي باب الأوضة يا واد يا بنا…
وعلي باب المندره يا واد يا بنا…
وعلي باب القاعة يا واد يا بنا…

ثم تأتي ليلة (نقل الأثاث) من منزل العروسة إلي عش الزوجية، فتنطلق الزغاريد والأغاني من فوق السيارات التي تحمل الأثاث ويبدأ الجميع في الغناء من حول السيارات فنسمع :

افرحي يادي الاوضة.. جياكي عروسه موضة...

افرحي يادي المندرة.. جياكي عروسه سكرة...

افرحي يادي القاعة.. جياكي عروسه الساعة...

وما أن يقتربوا من المنزل الذي سيجمع العروسين حتى نسمع :

رشوا الشارع ميه.. عروسة الغالي جاية .

رشوا الشارع كاكولا.. عروسة الغالي منقولة.

ايوة يا حارة ضالمة .. أجنا اللى نورنا

أيوة يا حارة هس هس .. أحنا اللى عمالنلكم حس

ليلة الحنة
ثم يأتي بعد ذلك مظاهـر الاحتفال بالحنة أو(ليلة الحنة) والتي تكون غالبا في بيت العروسة فنجد العروسة تجلس وسط صديقاتها وتتولى إحدى السيدات رسم الحناء علي يديها، ويبدأ أهلها وأقاربها في الغناء علي دق الطبلة فنسمع

مدي ايدك يا عـروسه.. مدي ايدك للحنة...

مدي ايدك يا عـروسه.. مدي ايدك وتحنَي...

وكذلك تتغنى السيدات طلبا للعريس

بس الوله يجي.. بس الولة يجي...

يجي عالمحطه.. وادبحلوا بطة...

يجى عند دارنا .. وادبحلة حمامنا ، واشاورلة يجى

يجي عالتسريحة.. وأحطلوا ريحه...

وإسكاتا للأب تغني السيدات

يحيا أبوها يحيا.. يحيا أبوها يا جدعان...

يحيا أبوها وشنبه.. اللي ما حدش غلبه...

وطبعا مالناش الحق نسال اللي أبوها حالق شنبه يعمل إيه.

أما في منزل العريس فالأمر لا يختلف كثيراً فنجد فيه (حفلة وداع العزوبية) وهنا نجد أصدقاء العريس يغنون له فيقول أحدهم

حلال عليك ست الحلوين.. عرفت يا عريسنا تنقي...

رشوا الملح يا ناس م العين.. ورقصوني ده أنا من حقي...

الليلة ليلة هنا وسرور.. وكوبيات في صواني بدور...

ومالناش دعوة باه الكوبيات دي فيها إيه

أدحرج واجري يا رمان
ونصل إلي ليلة الفرح الكبرى .. ليلة الزفاف أو ( ليلة الدخلة ) .. فالأنوار معلقة في بيت العروسين .. أصدقاء العروسة يحيطون بها في إحدى غرف المنزل حيث تجلس بين يدي " الكوافيرة " فتنطلق أغنية

ما تزوقيني يا ماما.. قوام يا ماما...

ده عريسي هايخدني.. بالسلامه يا ماما...

ومتعرفش بصراحة هي مستعجلة علي إيه، أكنها مخطوبة للسيد نجل.... ولا بلاش

أما بيت العريس فترى نفس المشهد , فأصدقاؤه يحيطون به وهو يرتدي ملابس الفرح وهنا نسمع

يا أولاد بلدنا يوم الخميس..

ها كتب كتابي وابقي عريس..

الدعوة عامة وها تبقي لمة..

وها يبقي ليه في البيت ونيس... يا أولاد بلدنا.

أما في الليل تنطلق الزفة وتبدأ بزغاريد متتالية ثم يبدأ الغناء من الجميع، فقد وصلت الفرحة ذروتها، فعلي نغمات الفرق الموسيقية نسمع :

بسم الله الرحمن الرحيم وهنبدأ الليلة.. آه.. آه ..

دة عريسنا الزين كحيل العين وعروستة حلوة وجميلة
حنقول يا ليل، ونقول ياعين..
حصوة في عينك ياللى
ياللى ما تصلى ، ماتصلى على النبى
ثم يبدءون في

صلي.. صلي.. ع النبي صلي

واللي ما يصلي أبوه أرملي.. صلي

وكذلك

أدحرج واجري يا رمان.. وتعالي علي حجري يا رمان..

دانا حجري حنين يارمان.. يخدك ويميل يا رمان..

ونسمع أيضا اشهر الأغاني الشعبية

دقوا المزاهر يلا.. يأهل البيت تعالوا

جمع ووفق والله.. وصدقوا اللي قالوا

عين الحسود فيها عود يا حلاوة..

عريس قمر وعروسته نقاوة..

واحنا الليلة دى كدنا الأعادي.

وعند توصيل العروسين تزف العروسة بـ

طالعة السلالم يا مشا الله عليها..

ست العرايس والعريس في أيديها.

المنافسة مشتعلة
أما الطريف أننا نسمع أغاني كثيرة تعبر عن المنافسة بين أهل العريس أهل العروسة فلكل جانب أغنياته.

فأهل العريس ينشدون

خدناها ..خدناها ..

طلبناها م الصيف الماضي.. وأبوها ما كنش راضي..

وعلشنها بعنا الأراضي.. الحلوة اللي كسبناها..

خدناها بالملايين.. وهما ما كـنوش راضيين..

علشنها بعنا الفدادين.. الحلوة اللي كسبناها.